بيساعد المتابعين بتوعه وبيقف جمبهم.. وبيعملهم مسابقات وبيكسبهم فلوس كتير.. وبيقول عليهم اخواتي مش جمهوري.. وهما أصحاب الفضل في اللي وصلتله.. وأي زرق أنا بكسبه رزقهم هما كمان..
معروف عن أحمد العوضي جدعنته وشهامته مع المتابعين والجمهور.. فـ “العوضي” يوم عن يوم بيثبت لجمهوره إنه في ضهرهم وواقف معاهم.. ومبقاش في حد فيهم بيحتاج حاجة إلا وهو بيلاقي “العوضي” في ضهره ومعاه.. فيا ترى ايه هى العلاقة المميزة اللي بتجمع العوضي بجمهوره.. وليه “العوضي” بيحب دايمًا جمهوره يقاسمه في أي رزق بيجيله ؟
بعتبر الجمهور كله اخواتي
الموضوع بدأ بنشأة العوضي.. فهو زيه زي أي شاب بسيط.. اتولد في عين شمس.. وحاله كان مستور لكن متولدش في بؤه معلقة دهب.. وفضل عايش مع والده ف في منطقة عين شمس خاصة إنه يتيم.. وكان بيتهم صغير ومساحته 60 متر بس.. واتربى “العوضي” من والده على الشهامة والجدعنة.. وحتى بعد الشهرة والنجومية العوضي منسيش الأصول ولا الواجب.. لدرجة إنه بيقول على “جمهوره” اخواتي.. ومبيعتبرش العمل بتاعه نجح إلا لو الجمهور حبه.. فقال “العوضي” عن علاقته بجمهوره:
“أنا معتز جدًا بنشأتي،، وطالع بأصول وأخلاق عين شمس،، وبحس إني سفير للطبقة الشعبية،، وفخور إني من عين شمس،، وشخصيًا أنا منتمي ليهم جدًا،، وبنزل عالطول عين شمس أشوف ردود أفعالهم على أدواري،، وعمري ماقولت كلمة جمهوري أقول إخواتي،، ولما بعمل العمل تقييمه بالنسبالي بيكون منهم،، وممكن اجيب أخويا عامل البوفيه يقولي رأيه فيه أهم من رأي النقاد بالنسبالي”..
مسابقات للجمهور بالملايين
كمان جدعنة “العوضي” كملت بالمسابقات اللي بدأ يعملها لجمهوره من كام شهر.. فقرر “العوضي” إن أي مسلسل أو فيلم جديد أو حتى إعلان هيعمله.. هيعمل مسابقة ويخلي الجمهور يكسبوا فيها.. عشان هما كمان شركاء ليه في نجاحه.. وإنه مش بيعمل كدا عشان تريند ولا عطف علي المتابعين.. وقال عن المسابقات اللي بيعملها للمتابعين والجمهور:
“أنا عملت المسابقة ده عشان عايزة أراضيكم زي ما انتوا بتراضوني وبتحبوني،، ولو معايا شوية فلوس فده بسبب حبكم ليا،، وده ملوش علاقة بالصدقة،، أنا عايزة افرحكم زي ما بتفرحوني،، لأن الصدقة في الخفا،، لكن ده ببقا عايزة أبسط اخواتي بيها،، وأنا النهاردة بتكلم بمنطق ليه الناس بتصدقني عشان بتكلم من قلبي،، وطلعت ببساطة وقولت أنتوا مراضييني بحبكم،، واللي خلاني نجم محبوب الناس،، ولما بعمل مسلسل بشتغله عشان الناس،، والفنان ولا حاجة من غير الناس،، وأنا براضي اخواتي زي ما هما مراضييني فده من قلبي”..
بيعمل الخير وبيساعد المحتاجين
كمان “العوضي” عمل مسابقة جديدة خلال شهر رمضان عن مسلسل “حق عرب”.. وبيكسب فيها المتابعين كل يوم 5 منهم.. وخلال إجابات المتابعين على المسابقة.. منهم متابع والدته مريضة .. كتب لـ “العوضي” رسالة مخصوص ليه في التعليقات قاله فيها:
“أقسم برب الكون الفلوس ده هجيب منها علاج لـ أمي،، وقسما بالله ما بحلق كذب ابدا في الأيام المباركة ده،، ريا رب أكسب،، وربنا يعلم أنا محتاج الفلوس ده ليه،، واد ايه أنا محتاجها،، فشوف كومنتي بالله عليك،، تاريخ الكشف في الروشتة اهو،، والله ما جبنا العلاج لحد دلوقتي،، لو مش مصدقين ابعتلكم رقم الدكتور تتأكدوا من الحالة،، أنا واثق نت ربنا ثم فيك يا فنان،، عشان أنا عارف إن العوضي إنسان عنده رحم”,, واتفاجئ المتابع إن العوضي اتفاعل معاه فعلا.. وهيساعده في علاج والدته..
مواقفه الكوميدية مع المتابعين
كمان “العوضي” بيحب دايمًا يكون متفاعل مع جمهوره.. وبيهزر معاه.. وليه مواقف كوميدية كتير معاهم.. زي “متابع” ماكنش بيرد على “العوضي”.. فنشر العوضي رسالته ليه وعلق عليها وقال: “اخواتي حد يفوق الونش يقوله انه كسب “.. غير إن بيتفاعل مع المحلات اللي بتنشر دعايا لهدومهم بالللازمة بتاعة “العوضي” في مسلسل “حق عرب”.. وكلمته المشهورة فيه: “ده الجاكيتة الأكثر طلبًا”..
وطبعًا الطريقة اللي بيتعامل بيها “العوضي” مع المتابعين بتوعه.. خلت فيه علاقة مميزة بينهم وبني بعض.. وبقا بيعتبرهم اخواته مش الجمهور بتاعه.. فيا ترى شايف “العوضي” بيعمل كدا فعلا بعفوية.. ولا بيحاول يكسب شعبية وتريند ؟
