كانت واحدة من معجباته.. واتحولت الصداقة بينهم لـ حب.. عوضته عن فراق هدى سلطان.. وعاشت معاه 28 سنة.. وكانت معاه لحد آخر يوم في عمره.. قصة حب سهير ترك ووحش الشاشة فريد شوقي.. ليه بعدت عن الأضواء !
أعلنت أسرة الفنان الراحل فريد شوقي.. عن وفاة أرملته السيدة سهير ترك.. بعد صراع مع المرض.. فـ بالرغم من إن وحش الشاشة كان متعدد الزيجات.. لكن سهير ترك كانت السيدة الأخيرة في حياته.. وعاش معاها 28 سنة.. فيا ترى من هى سهير ترك.. وازاي قصة حبها مع وحش الشاشة استمرت كل ده ؟ ..
قصة حب بدأت بمسرحية الدلوعة
البداية كانت بانفصال فريد شوقي عن الفنانة هدى سلطان.. بعد قصة حب كبيرة بينهم.. لكن غيرته عليها خلت استمرار الجواز مستحيل.. وقرروا ينفصلوا عن بعض.. وقتها بدأ وحش الشاشة يحس بالوحدة.. خاصة إنه مش متعود يقعد لوحده.. وجاب عمته ووالدته عشان يقعدوا معاه.. وفي الوقت ده.. اتعرف وحش الشاشة بالصدفة على السيدة سهير ترك.. واللي كانت واحدة من معجباته.. فكانت بتحب تمثيله جدًا.. وحريصة إنها تحضر مسرحياته.. فقررت “سهير” تحضر مسرحية “الدلوعة”.. وبعد انتهاء المسرحية راحت “سهير” لفريد شوقي وعبرت له عن إعجابها بأدائه وتمثيله.. وكان كلامها رزين جدًا ومتحفظ.. فأعجب “وحش الشاشة” بطريقتها اللبقة في الكلام واحترامها,, وحبها للفن والتمثيل.. وحس إنها مختلفة عن البنات اللي يشوفهم .. واللي بيحاولوا دايمًا يشدوا انتباهه.. بالدلع والميوعة زي ما كان بيقول عليهم.. /
صداقة اتحولت لـ حب
ومن بعد لقاء سهير ترك ووحش الشاشة في المسرحية.. بدأوا الاثنين يتحولوا صحاب.. وبقي فريد شوقي بيكلمها في التليفون وكمان بيتقابلوا سوا.. لكن كان دايمًا بيحاول يظهر ليها دايمًا احترامه ليها.. لحد ما توفى والد فريد شوقي.. وقررت سهير ترك تروح مع والدها مكتب الفنان فريد شوقي عشان يقدموا واجب العزاء ليه.. وفي اليوم ده طلب منها فريد شوقي إنها تزوره تاني يوم.. وفعلا لما زارته طلب منها تتجوز.. ووافقت “سهير” وكانت فرحانة جدًا.. واتجوزت هى ووحش الشاشة..
سهير ترك بعيدة عن الأضواء والشهرة
وحس فريد شوقي بالاستقرار أخيرا مع سهير ترك.. وكان مبسوط معاها.. وعوضته عن انفصاله عن هدى سلطان.. خاصة إن سهير ترك مكانتش بتحب لا الشهرة ولا الأضواء.. وكانت بعيدة تمامًا عنها.. إلا في لقاءات تلفزيونية قليلة بتجمعها مع فريد شوقي.. وكانت متفرغة ليه ولبناتها الاتنين رانيا فريد شوقي وعبير فريد شوقي.. وكمان كانت علاقتها بـ بنات جوزها كويسة.. وحالة الاستقرار اللي عاشها فريد شوقي مع سهير ترك.. خلتها تكون الزوجة الأخيرة في حياته.. وعاش معاها 28 سنة.. ولحد آخر يوم من حياته..
وداع سهير ترك لـ وحش الشاشة
وقبل كم يوم من وفاة السيدة سهير ترك.. نشرت سهير ترك منشور تدعي فيه لـ “وحش الشاشة” بالرحمة.. وبعد كام يوم.. تلحق سهير ترك بجوزها فريد شوقي بعد صراع مع المرض.. فأعلنت الفنانة ناهد السباعي عن وفاة زوجة جدها ووالده خالتها رانيا في منشور ليها على الفيسبوك وقالت: “إنا لله وإنا إليه راجعون، توفت إلى رحمة الله تعالي زوجة جدي السيدة سهير ترك،، والدة خالاتي رانيا فريد شوقي وعبير فريد شوقي،، نسالكم الفاتحة والدعاء لكل من فقدناهم”..
وودعت أسرة وحش الشاشة السيدة سهير ترك .. ووصلوها لمثواها الأخير في مقابر فريد شوقي على طريق الفيوم.. في ظل انهيار بناتها الاتنين رانيا وعبير.. ومحاولة الأسرة إنهم يساندهم في حزنهم.. ويكونوا جمبهم.. ربنا يرحم السيدة سهير الترك ويصبر أسرتها ..
