شيماااو نجمة التيك توك والمهرجانات الشعبية.. سلمى أبوضيف اتحولت لـ بنت شعبية في أعلى نسبة مشاهدة

اتحولت لـ بنت شعبية من الحلمية.. وقلدت بنات التيك توك.. وبقت بتتكلم زيهم.. واتحولت لـ نجمة عليها.. وكمان بقت بتعمل مهرجانات شعبية.. وبترقص على التيك توك..

اتصدرت سلمى أبوضيف التريند على السوشيال ميديا.. بعد نجاحها الكبير في دور “شيماء” أو”شيماااو” في مسلسل أعلى نسبة مشاهدة.. فبين يوم وليلة اتحولت “سلمى” من البنت الموديل الجميلة ونص كلامها انجليزي.. لـ بنت شعبية من الحلمية.. بتتكلم زي بنات التيك توك وبتقلد حركاتهم.. فيا ترى ازاي سلمى أبوضيف اتحولت لـ شيماااو في مسلسل أعلى نسبة مشاهدة.. وهل فعلا بتقلد حنين حسام ؟

سلمى أبوضيف في دور شيمااااو

البداية كات مع اختيار الفنانة الشابة سلمى أبوضيف.. بطلة لمسلسل “أعلى نسلة مشاهدة”.. واللي بيتكلم عن بنات التيك التوك.. وازاي بيتاجروا في نفسهم عشان يكسبوا فلوس ويتحولوا لـ تريند بـ فيديوهاتهم.. ولعبت “سلمى” دور “شيماء” البنت الشعبية البسيطة من منطقة شعبية .. وبتعاني من فقر أبوها وأمها.. وبيلعب معاها الحظ في مرة وتعمل فيديو مع أختها على التيك توك يتحول لـ تريند.. فبتقرر تعمل فيديوهات كتير على التيك توك عشان تجيب فلوس لـ نفسها ولـ أهلها.. وكمان تعمل إعلانات للمحلات وتشتغل كموديل.. عشان تكسب فلوس أكتر.. وبالتدريج تدخل عالم التيك توك وقضية الاتجار في البنات من خلال الاشتراك في قنوات مشبوهة على التيك توك..

شيمااااو نجمة التيك توك والمهرجانات

وطبعًا قضية المسلسل جذبت عدد كبير جدًا من الجمهور والمتابعين.. خاصة إنه أول مسلسل تقريبا يسلط الضوء على قضايا البنات اللي اتورطت في قضايا التيك توك.. كمان جذبهم تمثيل “سلمى أبوضيف” لدور شيماء أو شيماااااو زي ما الكل بيناديها في المسلسل.. لأنهم متعودين يشوفوا “سلمى” في دور البنت الارستقراطية اللي بتتكلم إنجليزي.. وشبه الموديل في جمالهم.. لكن فجأة “سلمى” صدمت الجمهور بظهورها الجديد.. وتحولها لـ بنت شعبية بالشكل ده.. حتى مخارج ألفاظها والحروف بقت بتتكلم زي بنات التيك توك بالظبط.. وعرفت تقدم دورها بطريقة مميزة جدًا..

أغنية مهرجانات مع المدفعجية
مش بس كدا.. دا كمان سلمى أبوضيف .. عملت أغنية مع المدفعجية في الحلقة العاشرة.. وكانت بتغني معاهم أغنية مهرجانات وبترقص عليها في سياق أحداث المسلسل.. وقالت في الأأغنية “على التيك توك أنا التوب”.. وحققت الأغنية نسبة مشاهدة عالية.. وبقا الجمهور مش مصدق التطور الكبير اللي وصلت ليه سلمى أبوضيف من بنت ارستقراطية لـ شعبية.. وقالوا في تعليقاتهم على دورها في المسلسل: “سلمى أبوضيف تفوقت على نفسها في الدور ده،، وخلتنا كلنا نتعاطف معاها”.. “تطور كبير وواضح في أداء سلمى أبوضيف،، وحبيت شخصية شيماااء في المسلسل”..

بتجسد حياة حنين حسام ومودة الأدهم
كمان المتابعين والجمهور ومع تعليقاتهم الإيجابية لاحظوا إن قصة المسلسل عن بنات التيك توكرز مودة الأدهم وحنين حسام.. خاصة إن الاتنين بدأوا حياتهم بفيديوهات بسيطة على التيك توك.. وبعدها بدأوا يعملوا فيديوهات جريئة عشان يعلوا الفيوز والريتش.. واتورطوا في الاخر في قضايا كبيرة.. فاتورطت حنين حسام في قضية الاتجار بالبنات.. أما مودة الأدهم فاتورطت في قضايا مشبوهة.. والاتنين كانت نهاياتهم ورا القضبان.. وده اللي بتجسده “شيماء” في مسلسل “أعلى نسبة مشاهدة”.. واللي هتكون نهاياتها هى كمان السجن بسبب فيديوهات التيك توك..

سلمى أبوضيف دافعت عن شيماء
أما الفنانة سلمى أبوضيف فموضحتش قصة المسلسل عن مين.. لكنها أكدت إن الدور ماكنش سهل عليها.. وكان صعب في تفاصيله جدًا.. فقالت سلمى أبوضيف في تصريحاتها:

“المسلسل كله كان صعب وكنا بنهتم بالتفاصيل العميقة، وحياة شيماء مش سهلة إطلاقاً، هي بتصحى كل يوم مش عارفة التريند والدنيا هتاخدها فين، ودا بيولّد عندها إرهاق جسدي ونفسي، وفيه ناس الظروف بتحطّها في مواقف أكبر منها، وبتخلّيها مش عارفة تتصرف إزاي، بالذات لما بيبقى في عدم وعي وخبرة، وخصوصاً لو الشخص محتاج فلوس، فبيبدأ يشوف أي فرصة،، وأنا تعاطفت مع شيماء، رغم أني مكنتش مهتمة بالتيك توك، بس لما لقيت في ناس فاتحة بيوتها من التيك توك، وعارضين حياتهم 24 ساعة للناس عشان ياكلوا عيش، وفيه منهم بيكسب حب الناس،، والمسلسل بيتكلم عن الفئة ده”..

قولنا ايه رأيك في أداء سلمى أبوضيف لـ دور “شيماء” في أعلى نسبة مشاهدة.. وهل فعلا قدرت تأدي الدور بنجاح ؟ ..