تصدر الترند بين يوم وليلة واسمه بقا أشهر من نار على علم والجمهور مبقاش ليه سيرة غير المال الحلال اهو، وبقى صاحب أخف دم في رمضان 2024 ، فيا ترى مين هو مصطفى أبوسريع صاحب تريند المال الحلال اهو في مسلسل العتاولة !
تريند المال الحلال اهو
تصدر اسم الفنان مصطفى أبو سريع، التريند على السوشيال ميديا، خلال الأيام اللي فاتت ودا بعد ظهوره بدور مميز وكوميدي في مسلسل “العتاولة”مع النجم أحمد السقا وطارق لطفي وباسم سمرة، فقدر مصطفى أبو سريع وسط كل النجوم ده يعمل ليه بصمة مميزة بأداء كوميدي بسيط .
وانتشر خلال الأيام اللي فاتت فيديو لمصطفى من الحلقة الأولى في مسلسل “العتاولة”.. وهو بيلعب دور “عاطف” جوز شادية أخت العتاولة.. ويوصل في المشهد عربة العفش بتاعته.. وبيفرح أول ما يشوفها.. فيخرج من عند الحلاق بفوطة الحلاقة.. وبيطبل على العربية ويرقص وهو بيقول: “المال الحلال اهو .. العفش بتاعي اهو”.. ورغم إنه مشهد بسيط جدا.. لكن مصطفى أبو سريع أداة بطريقة مميزة جدا.. خليته يتصدر التريند على السوشيال ميديا، ويكون رقم واحد في حديث الجمهور عن دراما رمضان ويبدأ يسألوا مين هو مصطفى أبو سريع.. وازاي مكنش ظاهر كل ده !
مين هو مصطفى أبو سريع ؟
مصطفى أبوسريع فنان مصري موهوب من محافظة الاسكندرية.. وزيه زي شباب كتير من الممثلين الموهوبين اللي ملهمش واسطة ولا شلة في الفن.. لكن كان بيحلم دايما يكون ليه مكان وسط الفنانين.. فدخل كلية الآداب قسم المسرح.. واتخرج منها وبدأ يشتغل في المسرح.. لحد ما قدر يوصل للسينما والتلفزيون من غير واسطة ولا محسوبية.. واكتشفه الفنان نور الشريف في مسلسل “عرفة البحر” سنة 2012 .
وكمان مثل مع الفنان محمود عبدالعزيز في مسلسل رأس الغول.. أما في 2016 فكانت انطلاقته الحقيقية وسط وجوه شابة كتير ظهرت في الوقت ده.. وبقا واحد من أهم النجوم اللي ظهروا على الساحة.. وعمل انطلاقة قوية خلال رمضان اللي فات بدوره في مسلسل الأجهر مع الفنان عمرو سعد .. وكمان مشاركته مع الفنان محمد هنيدي في مرعي البريمو .. لحد ما قدر يثبت نفسه السنة ده بدور عاطف في مسلسل العتاولة .. وسط وجود النجوم ده كلها.
مصطفى أبوسريع نجم الكوميديا والدراما
كمان ردود الأفعال من الجمهور على أدائه.. كانت إيجابية جدا.. وكلهم كانوا متفاعلين مع فيديو المال الحلال اهو.. و شايفينه ممثل كوميدي مهم.. وكمان أدائه في الدراما مميز جدا.. وقالوا في تعليقاتهم على دوره:
“مصطفى أبوسريع ممثل جامد،، واي دور بياخد يضيف ليه كتير،، وكل ما يطلع في مسلسل افيهات تطلع تريند،، متدلوش بطولة ليه، ممثل شاطر اهو،، كوميديان جامد،، افيهاته حاضره وبيطلع تريند،، ايه اللي ناقصه” ..
هجوم ماجدة خير الله على مصطفى أبوسريع
والغريبة إن رغم المدح الكبير اللي اتوجه لمصطفى أبو سريع على دوره في العتاولة.. لكنه واجه انتقادات وهجوم من الناقدة الفنية ماجدة خير الله، واللي شافت أدائه في المسلسل أوفر ومش موفق.. وكتبت في منشور لها على فيسبوك:
“يا جماعة اللي بيعمله (مصطفي أبو سريع) لا علاقة له ألبتة بفن التمثيل، هو احنا جرى لنا إيه؟،، هو أي جنان أو تهريج يبقي تمثيل؟،، راجع تاريخ الفن المصري محصلش الكلام ده في أسوأ عصور الفن،،
“كل اللي عملوا أدوار المجنون أو المتخلف أو السفيه محدش فيهم وصل لكده، المبالغة الحركية في الأداء تصلح لمهرجي السيرك،، ولو أن هذا الأسلوب تطور مع كثير من مضحكي السيرك في العالم، لا يليق أن نعتبره فنًا لمجرد أنه صاخب، بالنسبة لرتابة الآخرين” …
لكن الجمهور استمر في دفاعه عن مصطفى أبوسريع.. وشافوا إنه أفضل أداء في مسلسل العتاولة.. فيا ترى مصطفى أبوسريع هيرد على نقد ماجدة خير الله ولا هحاول يحسن من أدائه ؟
