والد حسام حبيب لـ one take: ابني سايب نفسه للشائعات أعتقد لسه بيحب شيرين وعاوز يكيدها

كشف والد حسام حبيب لأول مرة في تصريح خاص لـ one take تفاصيل الخلاف بينه وحسام حبيب حيث قال:” حسام ابني راجل كبير وفاهم ومش صغير والمفروض يلتفت لشغله وبس، سايب شغله بقاله اكتر من ست سبع سنين، واخرتها إيه يعني معقول هيبقى فاضي للستات بس مش أكتر من كده”.

وتابع:” مرة يضايق شيرين ومرة سارة إيه مش فاضي غير للحاجات دي، حسام راجل كبير ومحترم ومتعلم وابن ناس المفروض ياخد باله من شغله، ياخد هدنة شوية من الستات وشيرين ويتفرغ لشغله، ولما يعيد نفسه تاني يبقى يفكر في الجواز”.

وأوضح:” ملخص واقعة حسام حبيب وشيرين أننا كنا قصاد فنان بيضيع نفسه بنفسه، حتى مع شيرين ضيع وقت كتير أوي معاها وهي من البداية كانت علاقة غير صحية، خناقات وروجوع وخناقات ورجوع، حتى لما شيرين ابتدت ترجع تهتم بنفسها وشغلها هو طلع في برنامج بسمة وهبة يهاجمها.. الكلام ده كان يتقال في وقتها، كنت دافع عن نفسك وقت هي ما اتهمتك ليه الكلام ده دلوقتي”.

واختتم:” أنا بقف في الحق سواء مع ابني أو ضده، المفروض حسام يرجع لفنه ولشغله وجمهوره ويصلح ما أفسده الضهر، بعدين يدور على جواز، وبعدين هو اللي سايب نفسه للشائعات، ما كان يطلع من الاول يقول يا جماعة دي أخت أو صديقة، لكن اعتقد أنه مازال بيحب شيرين وعاوز يكيدها، ومن الحب ما قتل صحيح