الجمهور يحاصر محمد رمضان وأنغام في شارع المعز خلال تصويرهم إعلان لرمضان 2024

غاب في الدراما وراجع بالإعلانات.. محمد رمضان وأنغام في إعلان جديد.. الجمهور حاصرهم في كل حته.. والتصوير في شوارع مصر العتيقة.. بس ياترى أية طبيعة الإعلان اللي جمع بين أنغام ومحمد رمضان… 

 إعلانات رمضان

الموسم الرمضاني.. يعتبر واحد من أهم المواسم الفنية.. على كل المستويات والأشكال اللي بيستناها الجمهور والصناع.. وده للتنافس الكبير اللي بيكون موجود في المسلسلات.. ومش بس المسلسلات كمان البرامج المختلفة سواء الحوارية أو الترفيهية.. وبالإضافة بقى للاعلانات.. اللي بتتسابق الشركات حرفيا على إنهم ينتجوا إعلانات مميزه فيها افكار يستمتع بها الجمهور وأغاني رمضانية كمان مميزة.. وفي أغلب الوقت اللي بيفوز كل سنة بأحسن اعلانات.. هي شركات الاتصالات.

رمضان وأنغام 

ومع اقتراب بداية شهر رمضان 2024 خلال أيام بدأت كل الشركات تستعد لتقديم أعمالها خلال الشهر الكريم.. ومنهم إحدى الشركات اللي قررت تعمل اعلان رمضان يتم تصويره في عدد من أماكن القاهرة الجميلة.. منها شارع المعز والجمالية والحسين.. اللي شهد حشود وحصار للفنان محمد رمضان والفنانة أنغام.. اللي الناس حاوطتهم بكل حب علشان يتصوروا معاهم.. خلال تواجدهم لتصوير احد الاعلانات خلال شهر رمضان.. 

طبيعة الإعلان 

مش معروف تحديدا تفاصيل الإعلان.. لكنه هيكون من إخراج كاملة أبو زكري وكتب كلمات الأغنية اللي فيه أيمن بهجت قمر.. اللي وعد إن الإعلان هيبقى حاجه تليق بالجمهور وفيه مفاجآت كتير.. وظهر محمد رمضان وأنغام في فيديو متداول على مواقع التواصل الاجتماعي.. وكان لابس رمضان جاكت أحمر وأنغام كانت لابسه بلوزه لونها ابيض.. وكان متجمع حواليهم عدد كبير من الجمهور في شارع المعز.. وتوقع البعض من لبس محمد رمضان.. ان ده اعلان لاحدى شركات الاتصالات المعروفة باللون الاحمر.

 حب الناس: 

وده مش أول فيديو محمد رمضان ينزله خلال اليومين اللي فاتوا من المناطق دي.. فنشر رمضان أكثر من فيديو ليه مع الجمهور اللي حاصره.. ومنهم واحد من الشباب اللي بيحبه سابلوا موبايله.. في العربية علشان يعرف يكلمه في التليفون ورفض ياخده.. وكتب محمد رمضان تعليق على الفيديو أذكي معجب في مصر.

ولجمهور رمضان اللي كان فاكر انه السنادي هيغيب عن الشاشة بسبب تأجيل مسلسله جعفر العمدة في جزئه التاني.. بعد انشغال محمد سامي بمسلسله الجديد مع زوجته مي عمر نعمة الافوكاتو.. غير انشغال محمد رمضان في فيلمه الجديد أسد الأسود.. من تأليف خالد وشيرين دياب وإخراج محمد دياب.. وكمان عدم وجود وقت كافي لكتابة السيناريو وإضافة أحداث جديدة للقصة خاصة ان الجمهور كان متشوق جدا للجزء التاني.