“أنت منتصر بتاريخك”.. تامر حسني يدعم محمد سامي بعد قرار اعتزاله 

حرص الفنان تامر حسني على دعم محمد سامي بعد قرار اعتزاله الذي أعلنه بشكل مفاجئ، وذلك من خلال رده على منشوره عبر صفحته الشخصية على الفيس بوك . 

وكتب تامر:” أوعى تكون عايز تبعد عشان أي إحباط جايز يكون فعلاً في بعض المشاهد اللي الناس انتقدتها و انا شخصياً استغربتها شويه وقولت جوايا أنك مش محتاج تعملها أصلاً لأن عندك الحقيقي و الأهم بس على رأيك الفنون جنون أحياناً فكره مجنونه تنال الإعجاب و فكره لأ. 

وأضال:” بس ده ميخليناش ننسى إنها بعض مشاهد مش بعض أعمال لأنك بالفعل المخرج الوحيد في تاريخ مصر اللي مفشلش ولا مرة و يمكن الحظ محالفكش أوي في عمل ولا ٢ على مدار ١٤ سنه و دي حاجه مينفعش الجمهور ينساها لك انت قدمت مسلسل آدم اللي جمع كل المصريين و كل الوطن العربي يتفرجوا عليه زي ماتشات الكوره بسبب أنه أتكلم عن قضية تخص كل الوطن وكان بداية صوره جديده أول مره كانت بتتقدم في مصر وبعدها سبق الإصرار و حكاية حياة اللي كانوا نقله كبيره في ديكورات الدراما المصريه و بعدين الأسطوره و البرنس و جعفر العمده اللي حققوا نجاحات ساحقه و كانوا أعلى نسبة مشاهدات في الدراما بشكل عام و بعدهم نعمة الأڤوكاتو و إش إش و سيد الناس اللي برضو كل واحد فيهم يا أعلى مشاهدة يا تاني أعلى مشاهدة هزعل منك لو هتمشي محبط و أنت أنجح حد. 

وتابع:” الشجرة الخضراء الجميله ساعات بيطلعلها  

ورق أصفر بسيط عادي بيتقص و بتفضل شجرة كبيره و جميله و ده التطوير الطبيعي للبني آدم و اللي بيمر بيه أي ناجح بيطور و عنده شخصيه بدليل مسلسلاتك بيتقال عليها مسلسلات محمد سامي و تركيز الناس معاك دليل على حبهم لأعمالك و رغم أن بعضهم بينتقدوها بس متابعينها حرف حرف و نقدهم ليك بيبقى على قد حجمك و هي دي ضريبة الناجحين الكبار. 

وأختتم:” سافر و كمل حلمك و أنت منتصر بتاريخك و أوعى تُحبط و أنا عارف إن محمد سامي اللي اكتشفته أنا و قدمته للصناعه و هو عنده ٢٧ سنه لايمكن هيتهز ممكن يزعل يومين و يراجع نفسه في مشاهد أنا مبسوط منك أنك بمنتهى الشجاعة الأدبية اعتذرت على تقديمها خذ راحه شويه و إرجع أقوى من الأول و أنا واثق من اللي هتسافر عشانه أنه قرار هيضيف نقله كبيره لمشوارك.