رامز بيظهر بنفسه.. فنانين كتير اتصابوا.. ورضا عبد العال رجع المليون.. بعد الانتهاء من التصوير.. تفاصيل برنامج رامز قفل اللعبة في رمضان 2024..
طقس رمضاني
مفيش شك إن برنامج رامز جلال يعتبر البرنامج الأهم والأشهر خلال الموسم الرمضاني.. لدرجة إنه أصبح طقس أساسي على الفطار.. زيه زي قمر الدين بالظبط.. الاتنين لازم يبقوا على السفرة بس مش لازم نحبهم.. وده لان رامز سنويا بيتهاجم وبتخرج حملات لمقاطعة البرنامج.. وفي الاخر لازم يبقى موجود على الفطار مجرد فضول..
والسنادي ومع اقتراب بداية الشهر الكريم.. بدأ الجمهور يسأل عن تفاصيل البرنامج.
وياترى جايب مين.. وطبعا كله مستني كريستيانو رونالدو بما إن الممول هيئة الترفيه السعودية.. لكن بحسب التسريبات اللي خرجت.. كمان السنادي فشل رامز في إنه يستضيف كريستيانو رونالدو.. وعلى سيرة كريستيانو.. البرنامج السنه دي هيكون فيه عدد كبير جدا من نجوم كرة القدم.. سواء من الأهلي أو الزمالك.. زي كهربا وأمام عاشور أحمد فتوح والونش..
هيظهر بشخصيته
وبحسب الصحفي هاني عزب.. اللي نشر تفاصيل البرنامج قبل عرض البرومو الرسمي.. البرنامج هيظهر فيه لأول مرة رامز بشخصيته الحقيقية.. وكل الضيوف هيبقوا جايين وعارفين إنهم هيقابلوا رامز.. لكن محدش فيهم يعرف بالضبط تفاصيل المقلب.. وبمجرد ما رامز يستقبلهم ويتكلموا.. بيسقطوا في حفرة بتنزلهم في زحليقه كبيرة.. منها بينزلوا على بركة مياه مش نضيفه.. و يخرج عليهم تمساح وكلب شرس..
لكن المفاجأة الأكبر أن كل حلقة هيكون فيها ضيفين.. النجمين بيكونوا إما في بينهم تنافس قوي.. أو هما أصلا متخانقين.. ف بمجرد ما بينزلوا بيتفاجئوا ببعض.. ومن الشخصيات اللي هتكون موجوده.. مع بعض في نفس الحلقة.. الشرنوبي وسارة الطباخ.. حسن شاكوش مع طليقته.. نسرين أمين ويسرا اللوزي.. كهربا في حلقة مع عبد الله السعيد.. وأمام عاشور مع احمد حسام ميدو.. والونش ومحمد عبد المنعم.. كمان المفروض أن نجم المنتخب السعودي واللاعب الأكثر استفزازا لكل نجوم العالم.. علي البليهي هيكون ضيف واحدة من الحلقات..
أزمات رامز قفل اللعبة
البرنامج قبل العرض رسميا بدأت أزماته.. واللي قائمة بشكل أساسي على إصابات النجوم.. الل أقل حد فيهم خرج بكدمات في أنحاء متفرقة من جسمه.. وأبرز المصابين من البرنامج سمية الخشاب وشيرين رضا.. وربما تكون اصابة الونش بالصليبي بعد عودته مباشرة من اصابته الاولى بالصليبي تكون بسبب البرنامج بردو..
وظهرت شيرين رضا خلال استضافتها في برنامج معكم منى الشاذلي.. بالعكاز وقالت إن جالها شرخ في الانكل.. بعد ما وقعت في حفرة.. وظهر إنها مش عاوزة تقول السبب الحقيقي بالظبط.. ويرجح البعض إن اصابتها دي بسبب ظهورها مع رامز جلال ونتيجة للمقلب اللي عمله..
وبنفس الطريقة اتصابت الفنانة سمية الخشاب.. وتم حجزها في مستشفى الزهراء في البرشاء بدبي.. والتشخيص الطبي أكد اصابتها بكسر في طرف الكعب الشظوي وتمزق في اربطة الكتف والقدم.. وبسبب الإصابات دي اتعطل تصوير مسلسلها بـ 100 وش لمدة 21 والمقرر عرضه في رمضان 2024.. وسميه لسه باقي لها حوالي نص مشاهدها..
تفتكروا مين تاني ممكن يكون اتصاب في برنامج رامز من النجوم؟
